Sa gitna ng lumalabas na mga hindi beripikadong ulat na iniuugnay ang isang indibidwal ang nakipagnegosasyon sa Commission on Elections (COMELEC) para sa accreditation ng United Bangsamoro Justice Party (UBJP), malinaw na itinuturo ngayon ng mga pangyayari na ang pangunahing nagtulak sa usapin ay ang Third Party Monitoring Team (TPMT) bilang bahagi ng pangangalaga sa integridad ng Bangsamoro peace process.

Ayon sa mga tala at serye ng mga pagpupulong, mas pinaigting ng TPMT ang kanilang pakikipag-ugnayan sa COMELEC sa pamamagitan ng media briefings at high-level engagements upang ipabatid ang kahalagahan ng pagprotekta sa Comprehensive Agreement on the Bangsamoro (CAB) at ang pagpapanatili ng mapayapa, malinis, at demokratikong halalan sa BARMM.

Kasabay nito, isa-isang sinagot ng legal team ng UBJP ang mga petisyong inihain laban sa kanilang accreditation. Kabilang sa mga alegasyon ang umano’y paglabag sa gun ban, pagkakaroon ng armadong kaugnayan, at isyu ng foreign funding.

Ngunit ayon sa kampo ng UBJP, ang mga paratang ay nakabatay lamang sa hearsay, hindi authenticated na social media posts, at mga alegasyong walang sapat na ebidensya upang patunayan ang mga akusasyon.

Para sa marami, ang usapin ay hindi na lamang simpleng accreditation ng isang political party. Mas malawak umano ang implikasyon nito sa pagpapatuloy ng Bangsamoro transition at sa pangangalaga sa mga tagumpay ng usapang pangkapayapaan.

Sa huli, binibigyang-diin ng mga stakeholder na ang tunay na laban ay hindi tungkol sa pulitika ng pagkakahati, kundi sa pagpapatibay ng demokratikong proseso bilang pundasyon ng kapayapaan sa Bangsamoro.