Pinagtibay ng Office of the Provincial Administrator (OPA) ng Maguindanao del Sur, sa ilalim ng pamumuno ni Provincial Administrator Datu Nur-Ali Midtimbang, ang kahalagahan ng mahusay at makataong customer service para sa mga frontline personnel ng tanggapan.

Bilang bahagi ng patuloy na pagsusulong ng kapayapaan, kaunlaran, at mahusay na pamamahala sa lalawigan, nagsagawa ng Customer Service Orientation noong Mayo 19, 2026 sa Pamagayon Hall, Provincial Capitol sa Buluan, na nilahukan ng mga empleyado mula sa OPA.

Ang naturang aktibidad ay bahagi ng estratehikong programa ng Provincial Local Government Unit (PLGU) sa ilalim ng liderato ni Governor Datu Ali Midtimbang upang higit pang mapabilis, mapahusay, at maging mas makatao ang paghahatid ng serbisyo publiko sa mga mamamayan ng lalawigan.

Sa kanyang naging talakayan, ibinahagi ni Division Chief Roger Dionisio ang mahahalagang pundasyon tungo sa mas episyente at propesyonal na frontline service. Binigyang-diin niya ang kahalagahan ng pagkakaroon ng mataas na pamantayan sa pakikitungo sa publiko upang matiyak na ang bawat mamamayan ay makatatanggap ng “positive client experience” na may paggalang, malasakit, at agarang aksyon.

Kabilang sa mga prinsipyong itinampok sa orientation ang “Tipid sa Salita, Sagana sa Gawa” o “Under Promise, Over Deliver,” na ayon sa opisyal ay mahalagang susi upang mapanatili ang integridad ng tanggapan at tiwala ng publiko sa pamahalaan.

Bukod sa teknikal na aspeto ng serbisyo, binigyang-diin din sa aktibidad ang kahalagahan ng aktibong pakikinig, tamang pag-unawa sa pangangailangan ng komunidad, at pagyakap sa makabago at sistematikong proseso sa loob ng opisina.

Ayon sa OPA, layunin ng naturang inisyatibo na maitaguyod ang kultura ng “serbisyong may puso” — isang uri ng pamamahalang tapat, madaling lapitan, at tunay na may malasakit sa bawat mamamayang lumalapit sa kanilang tanggapan.

Dahil dito, patuloy na isinusulong ng Office of the Provincial Administrator ang isang makabago, episyente, at mapagkalingang uri ng pamamahala na nagsisilbing inspirasyon sa pagbibigay ng de-kalidad na serbisyo publiko sa buong Maguindanao del Sur.