MAGUINDANAO DEL SUR – Patuloy na pinaiigting ng Pamahalaang Panlalawigan ng Maguindanao del Sur, katuwang ang Ministry of Public Works (MPW) at Department of Public Works and Highways (DPWH) Region XII, ang pagpapatupad ng Dredging Project sa Municipality of General Salipada K. Pendatun upang mapabuti ang daloy ng tubig at mabawasan ang panganib ng pagbaha sa mga komunidad.

Isinagawa ang pinakahuling operasyon mula Hunyo 8 hanggang 11, 2026, bilang pagpapatuloy ng mga aktibidad na sinimulan noong buwan ng Mayo. Layunin ng proyekto na alisin ang mga naipong latak at bara sa mga daluyan ng tubig upang mapataas ang kapasidad ng mga ito sa panahon ng malalakas na pag-ulan.

Sa pakikipagtulungan ni Municipal Mayor Mielyn D. Ali, ipinakita ng mga ahensyang kasangkot ang pagkakaisa sa paghahatid ng mga programang nakatuon sa kaligtasan, disaster risk reduction, at kapakanan ng mga residente.

Ayon sa pamahalaang panlalawigan, higit pa sa flood mitigation ang layunin ng dredging project. Itinuturing din itong mahalagang hakbang sa pagtataguyod ng pangmatagalang kaunlaran, katatagan ng imprastraktura, at mas ligtas na kapaligiran na makatutulong sa pagpapalakas ng kabuhayan at tiwala ng mamamayan sa pamahalaan.

Binanggit din na ang inisyatiba ay umaayon sa pagsusulong ng mga programang pangkapayapaan at pangkaunlaran na sinusuportahan nina Vice Governor Hisham Nando at Congressman Esmael Mangudadatu, habang sa ilalim ng pamumuno ni Governor Datu Ali Midtimbang, patuloy na isinusulong ang maagap at responsibong paghahatid ng serbisyo para sa mga komunidad sa Maguindanao del Sur.