Naglabas ng matinding pahayag si Atty. Frances Cynthia J. Guiani, dalawang beses na nahalal bilang Pangulo ng Integrated Bar of the Philippines (IBP) Cotabato City and Maguindanao Chapter, upang linawin na ang mga naging pahayag ni Atty. Bai Dona Dilangalen kaugnay ng legalidad ng pagkakatalaga kay Interim Chief Minister Abdulraof “Sammy Gambar” Macacua ay personal niyang opinyon at hindi opisyal na posisyon ng IBP.

Ayon kay Guiani, walang konsultasyong isinagawa, walang resolusyong ipinasa, at walang pahintulot na ibinigay ang mga miyembro ng IBP upang katawanin ng sinumang abogado ang organisasyon sa naturang usapin.

“Ang opinyong ipinahayag ay sariling pananaw lamang at hindi dapat ituring na opisyal na tindig ng Integrated Bar of the Philippines,” diin ni Guiani.

Kasabay nito, binuksan din niya ang mas malawak na usapin hinggil sa epekto ng pagkakatalaga kay Macacua sa konteksto ng Bangsamoro Peace Process.

Ayon kay Guiani, hindi maaaring ihiwalay ang usapin sa naging suspensyon umano ni Macacua mula sa MILF Central Committee, dahil si Macacua ay hindi lamang isang opisyal ng Bangsamoro Government kundi bahagi rin ng istruktura ng MILF at ng Bangsamoro Islamic Armed Forces (BIAF).

Aniya, bagama’t malinaw na may kapangyarihan ang Pangulo ng Pilipinas na magtalaga ng Interim Chief Minister, nararapat pa ring suriin ang mas malawak na implikasyon nito sa pagpapatupad ng Comprehensive Agreement on the Bangsamoro (CAB) at sa pagkakaisa ng mga institusyong kasangkot sa peace process.

Binigyang-diin ni Guiani na ang CAB ay hindi lamang isang legal na dokumento kundi isang kasunduang bunga ng mahabang panahon ng negosasyon, sakripisyo, at pagtitiwala sa pagitan ng mga partido sa usaping pangkapayapaan.

Dahil dito, sinabi niyang anumang pampublikong komentaryo na tahasang nagdedeklara na walang kabuluhan o walang epekto ang naging aksyon ng MILF Central Committee ay dapat suriing mabuti dahil maaari itong makaapekto sa maselang balanse ng kapayapaan at pagkakaisa sa Bangsamoro.

Nagpahayag din siya ng pagkabahala sa paggamit umano ng pangalan ng IBP sa mga pampublikong talakayan nang walang pahintulot ng organisasyon.

Ayon sa dating IBP President, mahalagang malinaw sa publiko ang pagkakaiba ng personal na opinyon ng isang abogado at ng opisyal na posisyon ng isang institusyon gaya ng IBP.

Sa huli, nanawagan si Guiani ng maingat, responsable, at balanseng pagtalakay sa mga usaping may kaugnayan sa Bangsamoro leadership at peace process upang maiwasan ang paglala ng hidwaan at mapanatili ang mga nakamit na tagumpay ng kapayapaan sa rehiyon.

Ang naturang pahayag ay lumabas sa gitna ng nagpapatuloy na diskusyon sa iba’t ibang media platforms at social media kaugnay ng legalidad at implikasyon ng pagkakatalaga kay Macacua bilang Interim Chief Minister ng BARMM.