Patuloy na pinaiigting ng Pamahalaang Panlalawigan ng Maguindanao del Sur ang mga hakbang sa disaster risk reduction sa pamamagitan ng pagpapalawak ng Dredging Project sa bayan ng Pandag mula Hunyo 22 hanggang 26, 2026.

Sa pangunguna ni Governor Datu Ali M. Midtimbang Sr., katuwang ang Ministry of Public Works (MPW-BARMM) at DPWH Region XII, isinasagawa ang dredging operations bilang bahagi ng pangmatagalang programa upang mapahusay ang daloy ng mga ilog at waterways, mabawasan ang panganib ng pagbaha, at maprotektahan ang buhay, kabuhayan, at ari-arian ng mga mamamayan.

Sa pakikipagtulungan ng Lokal na Pamahalaan ng Pandag sa pamumuno ni Mayor Mohajeran K. Balayman, patuloy na naipatutupad ang mga proyektong pang-imprastraktura na naglalayong palakasin ang kahandaan ng komunidad laban sa mga sakuna at iba pang epekto ng matinding panahon.

Ayon sa Pamahalaang Panlalawigan, higit pa sa flood mitigation ang layunin ng proyekto. Inaasahan din itong makatutulong sa pagpapanatili ng kapayapaan at kaayusan sa pamamagitan ng pagbibigay ng mas ligtas na kapaligiran at mas matatag na imprastraktura para sa mga residente.

Kasabay nito, patuloy ding sinusuportahan ng inisyatiba ang peacebuilding advocacy nina Vice Governor Hisham Nando at Congressman Esmael Mangudadatu, kung saan ang mga proyektong pangkaunlaran ay nagsisilbing pundasyon sa pagpapalakas ng seguridad, pagkakaisa, at tiwala ng mamamayan sa pamahalaan.

Binigyang-diin ng Pamahalaang Panlalawigan na mananatili itong nakatuon sa pagpapatupad ng mga programang pang-imprastraktura at disaster resilience bilang bahagi ng layuning makapaghatid ng Serbisyong May Puso para sa lahat ng Maguindanaon.