Patuloy na pinalalawak ng Bangsamoro Youth Commission (BYC) ang mga oportunidad para sa kabataang Bangsamoro sa pamamagitan ng pakikipag-ugnayan sa iba’t ibang international organizations na nagsusulong ng youth leadership, community development, at regional cooperation.

Sa kanyang Facebook post, ibinahagi ni BYC Chairperson Nas Dunding ang paglulunsad ng isang international collaboration ecosystem na naglalayong bigyang-lakas ang mga kabataan bilang aktibong katuwang sa paghubog ng pampublikong diskurso, pagpapaunlad ng komunidad, at pagsusulong ng positibong pagbabago sa Indo-Pacific region.

Ayon kay Dunding, kinikilala ng inisyatiba ang mga kabataan hindi lamang bilang mga lider ng hinaharap kundi bilang mga pangunahing tagapagtaguyod ng pagbabago sa kasalukuyan.

Kabilang sa mga katuwang ng BYC sa naturang programa ang Taiwan-Asia Exchange Foundation, Digital Defense Alliance Singapore (DDAS), ASEAN-Australia Strategic Youth Partnership (AASYP), at Orphan Love Foundation ng Bangladesh.

Aniya, patuloy na bubuksan ng mga ganitong partnership ang mas maraming pandaigdigang oportunidad para sa mga kabataang Bangsamoro sa pamamagitan ng dayalogo, kooperasyon, at pagpapalakas ng kanilang kakayahan bilang mga susunod na lider.