Pormal na inilunsad ng Ministry of Health–Bangsamoro Autonomous Region in Muslim Mindanao (MOH-BARMM) ang Tulong Medical Assistance Program at Mercury Drug Assistance Project sa pamamagitan ng ceremonial turnover at paglagda ng Memorandum of Understanding (MOU) noong Hulyo 22, 2026 sa Haraya Hall, Alnor Hotel, Cotabato City.

Kabuuang ₱409.539 milyon ang inilaan sa ilalim ng TDIF 2026 Supplemental Fund, kung saan ₱377.539 milyon ang nakalaan para sa Tulong Medical Assistance Program at ₱32 milyon para sa Mercury Drug Assistance Project. Ang pondo ay ipatutupad sa pakikipagtulungan ng mga tanggapan ng mga Members of Parliament (MPs) upang mapalawak ang access ng mga Bangsamoro sa serbisyong pangkalusugan.

Makikinabang sa programa ang dose-dosenang pampubliko at pribadong ospital, district hospitals, birthing facilities, medical centers, at iba pang healthcare institutions sa BARMM at mga karatig-lugar, kabilang ang Cotabato Regional Medical Center, Amai Pakpak Medical Center, Maguindanao Provincial Hospital, Sulu Provincial Hospital, Bangsamoro Doctors Hospital, at iba pang partner hospitals at Mercury Drug.

Sa pamamagitan ng MOU, pormal na pinagtibay ang ugnayan ng MOH-BARMM, mga opisina ng MPs, healthcare institutions, at Mercury Drug upang matiyak ang maayos na pagpapatupad ng programa at mapabilis ang pag-access ng mga kwalipikadong Bangsamoro sa hospitalization, laboratory procedures, diagnostic services, mga gamot, at iba pang mahahalagang serbisyong medikal.

Pinangunahan ang koordinasyon ng programa ni Ms. Anisa A. Matuan, Chief ng Planning Division at TDIF Coordinator ng MOH-BARMM, katuwang sina Deputy Minister Dr. Zul Qarneyn M. Abas at Director General Dr. Abdulhalik M. Kasim.

Sa kanyang mensahe, binigyang-diin ni Minister of Health at Member of Parliament Dr. Kadil M. Sinolinding Jr. ang kahalagahan ng matibay na ugnayan ng pamahalaan at mga healthcare partners upang mabawasan ang pinansyal na pasanin ng mga pasyente at matiyak na ang bawat Bangsamoro ay may access sa dekalidad, abot-kaya, at napapanahong serbisyong pangkalusugan.