Nilinaw ng mga kamakailang desisyon ng Supreme Court En Banc sa G.R. Nos. E-02219 at E-02235 ang legal na balangkas na gagamitin para sa kauna-unahang BARMM Parliamentary Elections na nakatakdang idaos sa Setyembre 14, 2026.

Ayon sa inilabas na paliwanag, ang Bangsamoro Autonomy Act (BAA) No. 86 ang kinikilalang umiiral at legal na redistricting framework para sa nalalapit na halalan.

Ipinaliwanag din na naging hindi na maisasakatuparan ang BAA No. 58 matapos ang naging epekto ng desisyon ng Korte Suprema sa kasong Province of Sulu v. Medialdea, kung saan nagkaroon ng pitong parliamentary seats na hindi naisasama sa dating balangkas.

Samantala, idineklarang labag sa Konstitusyon ang BAA No. 77. Ayon sa paliwanag, kabilang sa mga kinuwestiyon dito ang pagbabago ng mga presinto sa panahon ng halalan, isyu ng gerrymandering, at ang hindi awtorisadong paglipat ng kapangyarihan sa redistricting.

Dahil sa permanenteng injunction laban sa BAA No. 77, ang BAA No. 86, na nilagdaan noong Enero 20, 2026, ang nananatiling tanging umiiral na legal na batayan sa paghahati ng mga parliamentary districts para sa darating na halalan.

Binigyang-diin din na ang mga desisyon ng Korte Suprema ay naglalayong mapangalagaan ang karapatang bumoto ng mamamayan at maiwasan ang disenfranchisement ng mga botante sa Bangsamoro.