Pinangunahan ni Moro Islamic Liberation Front Central Committee (MILF-CC) Chairman at United Bangsamoro Justice Party (UBJP) President Al Haj Murad Ebrahim ang MILF-BIAF General Assembly ng “Team TOPS” na ginanap sa MILF-CC Gymnasium.

Naging sentro ng pagtitipon ang paggunita at pagbibigay-pugay sa pamana ni Kumander Tops o Tops Solon, Julhani Sulog Tumbas Sr. (Enero 25, 1951–Setyembre 22, 2009), na dating Western Mindanao Front Commander ng MILF-BIAF, dating Chairman ng Coordinating Committee on the Cessation of Hostilities (CCCH), at dating Board Director ng Bangsamoro Development Agency (BDA).

Inilarawan si Kumander Tops bilang isa sa mga matatag na anak ng Bangsamoro na nag-alay ng kanyang buhay sa pagsusulong ng katarungan, dignidad, kalayaan, at karapatan sa sariling pagpapasya.

Sa assembly, muling binigyang-diin na ang mga nakamit ng Bangsamoro ay hindi basta ipinagkaloob kundi bunga ng mahabang panahon ng sakripisyo, pagtitiyaga, at paninindigan ng mga naunang henerasyon.

Naging venue rin ang pagtitipon para palakasin ang disiplina, pagkakaisa, at kolektibong pananagutan ng organisasyon, gayundin ang pagbibigay-orientation sa mga miyembro hinggil sa mga kasalukuyang development, direktiba, at patuloy na tungkulin ng kanilang organisasyon.

Binigyang-diin ng mga miyembro ng MILF Central Committee na ang lakas ng kilusan ay hindi lamang nakasalalay sa istruktura ng organisasyon, kundi sa pananampalataya, disiplina, sakripisyo, integridad sa moral, at katatagan ng mga miyembro nito.

Sa kanyang mensahe, nagbigay-pugay si Chairman Murad sa mga henerasyon ng Bangsamoro na nag-alay ng kanilang dugo, pawis, luha, at buhay para sa kanilang ipinaglaban.

Binigyang-diin niya na ang mga tagumpay at nakamit matapos ang ilang dekada ng pakikibaka ay may kaakibat na malaking pananagutan—ang mga ito ay dapat ipagtanggol, pagtibayin, at gawing pundasyon ng pangmatagalang pag-unlad para sa mamamayang Bangsamoro.

Ayon kay Murad, ang kasalukuyang awtonomiya ay hindi katapusan ng Bangsamoro struggle, kundi isang makasaysayang yugto sa nagpapatuloy na paglalakbay tungo sa mga mithiin ng Bangsamoro people.

Binalaan din niya ang mga mujahideen laban sa pagiging kampante sa mga pansamantalang tagumpay, at hinikayat silang manatiling ginagabayan ng pananampalataya, disiplinado sa kanilang mga prinsipyo, at matatag sa kanilang pananagutan sa mamamayang Bangsamoro.