Pormal nang inilunsad ng Office of the Provincial Agriculturist (OPAG) ang Project Kapamula, isang inisyatiba ng Pamahalaang Panlalawigan ng Maguindanao del Sur na naglalayong palakasin ang industriya ng niyog at mapataas ang kita ng mga magsasaka sa lalawigan.

Pinangunahan ni Provincial Agriculturist Engr. Jedahni Ulangkaya ang programa noong Hulyo 16, 2026, kung saan namahagi ng mga de-kalidad na coconut seedlings sa mga kooperatiba mula sa mga bayan ng South Upi, Rajah Buayan, Guindulungan, Datu Hoffer, Pandag, at Mangudadatu.

Kabilang sa mga benepisyaryo ang iba’t ibang farmers’ cooperatives na inaasahang mangunguna sa pagpapalawak ng produksyon ng niyog sa kanilang mga komunidad.

Kasabay ng pamamahagi ng mga punla, nagsagawa rin ang OPAG ng orientation at technical training hinggil sa tamang pagtatanim, pangangalaga, at pangmatagalang pamamahala ng mga taniman upang matiyak ang mataas na produksyon at mas magandang ani.

Ayon sa Pamahalaang Panlalawigan sa ilalim ng pamumuno ni Governor Datu Ali M. Midtimbang Sr., bahagi ang Project Kapamula ng mas malawak na programa upang palakasin ang sektor ng agrikultura, isulong ang seguridad sa pagkain, pangalagaan ang kalikasan, at makalikha ng napapanatiling kabuhayan para sa mga magsasaka sa Maguindanao del Sur.