Sa isang opisyal na pahayag, naglabas ng fatwa ang Bangsamoro Darul Ifta’ (BDI) na nagdedeklara sa paggamit ng tabako, sigarilyo, at mga alternatibong anyo nito gaya ng vape at e-cigarettes, bilang haram o mahigpit na ipinagbabawal sa ilalim ng batas Islamiko.

Ang desisyon ay resulta ng masusing pag-aaral at deliberasyon na isinagawa ng mga ulama ng BDI, batay sa mga prinsipyo ng Qur’an at Sunnah, at sa mga ebidensiyang medikal na nagpapatunay sa pinsalang dulot ng paninigarilyo sa katawan at lipunan.

Ayon sa BDI, ang paggamit ng tabako at vape ay kabilang sa mga al-khabā’ith — mga bagay na marumi at nakapipinsala, na tahasang ipinagbabawal sa Islam. Ito ay nagdudulot ng mga sakit, pag-aaksaya ng pera, at polusyon na nakaaapekto hindi lamang sa gumagamit kundi pati sa mga taong nakapaligid sa kanya.

“Ang kalusugan at buhay ay ipinagkatiwala ni Allah, kaya’t tungkulin ng bawat Muslim na ito ay pangalagaan, hindi sirain,” ayon sa pahayag ng BDI.

Hinikayat ng institusyon ang lahat ng Muslim sa Bangsamoro na iwasan ang lahat ng anyo ng paninigarilyo at vaping bilang pagpapakita ng pananampalataya at pagsunod sa utos ng Diyos. Ang hakbang na ito ay bahagi ng mas malawak na kampanya ng Bangsamoro Government tungo sa isang malusog, disiplinado, at maka-Diyos na pamayanan.