Naglabas ng opisyal na Memorandum Order No. 005, s. 2026 ang Moro Islamic Liberation Front Central Committee sa pamamagitan ng Office of the Chairman na nag-aatas ng mandatory participation sa nakatakdang 2026 MILF General Assembly.

Ang kautusan ay pirmado ni Al Haj Murad Ebrahim, Chairman ng MILF, at may petsang 10 February 2026 (22 Sha’ban 1447). Saklaw ng direktiba ang regular at expanded members ng Central Committee, general staff, department heads, front at base commanders ng Bangsamoro Islamic Armed Forces (BIAF), mga provincial committee chairpersons, line agencies, standing committees, Military Advisory Council, MILF Peace Implementing Panel, ABMMA, at mga lider ng Alpha at Bravo Companies — kapwa nasa loob at labas ng Bangsamoro homeland.

Ayon sa memorandum, ang General Assembly ay gaganapin sa Camp Darapanan Gymnasium sa February 16, 2026 mula 8:00 AM hanggang 1:00 PM. Layunin nitong palakasin ang organizational discipline, pagkakaisa ng direksyon, at koordinadong implementasyon ng mga polisiya sa lahat ng istruktura ng MILF.

Nakasaad din na ang naturang pagtitipon ang magsisilbing kulminasyon ng mga lokal at provincial assemblies na isinagawa, at magsisilbing forum upang dalhin ang mga usapin at rekomendasyon sa pinakamataas na decision-making body ng organisasyon.

Ang memorandum ay agad na magkakabisa sa oras ng paglalabas at mananatiling epektibo hangga’t hindi binabawi o inaamyendahan.