Isang malaking hakbang para sa human capital development sa Bangsamoro matapos pormal na matanggap ng Ministry of Basic, Higher and Technical Education (MBHTE), sa pamamagitan ng Technical Education and Skills Development (TESD), ang bagong tayong Male Dormitory at modernong training equipment mula sa Pamahalaan ng Japan nitong Pebrero 23, 2026.

Ang proyekto ay itinayo sa Regional Manpower Development Center (RMDC) sa Brgy. Rebuken sa Sultan Kudarat, sa ilalim ng Grant Assistance Program ng Japan at sa koordinasyon ng Japan International Cooperation Agency (JICA).

Ayon kay JICA Philippines Chief Representative Baba Takashi, ang dormitoryo ay hindi lamang isang gusali kundi isang ligtas at suportadong tahanan para sa mga trainees, lalo na yaong mula sa malalayong barangay. Aniya, nananatiling prayoridad ng Japan ang skills development, inclusive growth, at sustainable peace sa Bangsamoro.

Nagpasalamat naman si Mohagher M. Iqbal, Minister ng MBHTE, at binigyang-diin ang mahalagang papel ng edukasyon at skills training sa pagtataguyod ng pangmatagalang kapayapaan. “Quality TVET is not a secondary option—it is a lifeline,” ani Iqbal, sabay pagbibigay-diin na ang de-kalidad na technical-vocational education ay tulay mula kahirapan tungo sa produktibidad at katatagan.

Bukod sa dormitoryo, isinagawa rin ang pormal na turnover ng essential training equipment upang palakasin ang competency-based programs ng RMDC. Inaasahang magbibigay ito ng mas mataas na antas ng institutional capacity at industry-relevant skills para sa mga Bangsamoro learners.

Dumalo sa seremonya ang mga opisyal ng MBHTE-TESD, kinatawan ng Pamahalaan ng Japan at JICA, at iba pang stakeholders, bilang patunay ng matatag na internasyonal na kooperasyon para sa edukasyon, workforce development, at pangmatagalang kapayapaan sa BARMM.