Naglabas ng opisyal na pahayag si dating Ministry of Basic, Higher and Technical Education (MBHTE) Minister Mohagher M. Iqbal kaugnay ng pagpapatupad ng kanyang dismissal bilang pinuno ng naturang ministry.

Sa kanyang statement na may petsang Mayo 22, 2026, sinabi ni Iqbal na kanyang kinikilala ang naging desisyon ni Interim Chief Minister Abdulraof Macacua na tanggalin siya bilang MBHTE Minister epektibo noong Mayo 18, 2026.

Ayon kay Iqbal, ang pangunahing dahilan na ibinigay umano ng Interim Chief Minister ay “lack of trust and confidence” o kawalan ng tiwala at kumpiyansa sa kanya bilang pinuno ng MBHTE.

Gayunman, nilinaw ni Iqbal na ang kanyang dismissal ay isinagawa umano nang walang due process at iginiit niyang hindi siya nagbitiw sa kanyang posisyon.

Aniya, tumanggi umano siyang mag-resign dahil nais niyang maipagpatuloy ang maayos na turnover ng mga proyekto, records, at responsibilidad ng MBHTE upang matiyak ang maayos na transition sa loob ng ministry.

Binanggit din ni Iqbal na noong Mayo 19 ay nagtungo pa umano siya sa opisina upang opisyal na simulan ang turnover process, ngunit sinabi niyang noon pa man ay nauna nang umakto ang Interim Chief Minister bilang pinuno ng MBHTE noong Mayo 18.

Sa kanyang pahayag, kinilala rin ni Iqbal na may prerogative ang Chief Minister sa pagtatalaga at pagtanggal ng mga opisyal, subalit iginiit niyang hindi ito dapat isagawa nang walang pagsunod sa due process at constitutional guarantees.

Kasabay nito, nanawagan si Iqbal ng sobriety, restraint, at pagkakaisa sa gitna ng umiiral na tensyon sa Bangsamoro region, lalo na habang papalapit ang kauna-unahang Bangsamoro Parliamentary Elections sa Setyembre 14, 2026.

Hinimok din niya ang international community na ipagpatuloy ang suporta sa peace process sa pagitan ng pamahalaan at Moro Islamic Liberation Front (MILF), at panatilihin umano ang pagpapatupad ng Comprehensive Agreement on the Bangsamoro (CAB).

Sa huling bahagi ng kanyang mensahe, nagpasalamat si Iqbal sa mga kawani ng MBHTE at sa mga sumuporta sa kanyang pamumuno, kasabay ng paninindigang ipagpatuloy ang adbokasiya para sa edukasyon at kapayapaan sa Bangsamoro.